Estación de Santa Cruz de Arrabaldo (Ourense)


PROXECTO ESTACIÓNS SP1. 16/02:

Cofinanciado dentro da Iniciativa Comunitaria Interreg III-A España – Portugal ( F.E.D.E. R.).

Socios do proxecto: INORDE e a C.M. de Viana do Castelo.

O proxecto consistiu na revalorización de sete infraestruturas ferroviarias en desuso, situadas na zona transfronteiriza comprendida entre Galicia e o Norte de Portugal, para convertelas en enclaves idóneos para a revitalización económica, social e cultural das áreas que a forman, convertendo estas zonas en espazos de lecer, ecoturismo, turismo activo natural e cultural a través da recuperación e potenciación das rutas da Vía da Prata, os camiños Portugueses da Costa e do Interior, así como as Vías Xacobeas e a Vía Nova.

Todo iso é posible, grazas á a gran vinculación histórica das estacións cos espazos nos que se establecen, que lles confire un gran atractivo patrimonial e ambiental converténdoas en factores de gran interese para o desenvolvemento destas comarcas.

Esta estación de ferrocarril está situada na localidade de Santa Cruz de Arrabaldo – Ourense, e alberga o Museo do Traxe Tradicional Galego, Centro de interpretación do liño e o Museo Estanislao Reverter.

  • MUSEO DO AUTOMÓBIL – FUNDACIÓN ESTANISLAO REVERTER:

O Museo  Estanislao  Reverter inaugurouse o  11 de Xuño de 2014, nel recóllese o legado deste destacado piloto de rallys, un dos pais do automobilismo galego, falecido en 1991.

O Museo recolle a traxectoria deportiva de  Estanislao  Reverter e nel expóñense parte dos fondos da Fundación  Estanislao  Reverter.  Consta de dúas plantas.

A planta  superior é un percorrido pola vida deportiva de  Lalao desde os seus inicios, no ano 1955, ata o seu último  Rallye en 1975  onde a través de fotos, trofeos, placas, regulamentos e  rutometros, rodas dos seus vehículos, a maqueta restaurada por Marcial López do Circuito do Noroeste e diverso material, repásanse os vinte anos en activo como piloto.

A planta baixa dedícase ás outras facetas de  Lalao: creador do  Rallye de Ourense e fundador de Escuadra Ourense, promotor de pilotos co seu equipo  Reverter Competición e  construtor do mítico  Alpinche. Conta cun  Goggomobil, trofeos, unha colección de coches en miniatura de parte de vehículos cos que correu  Estanislao, cascos de diferentes épocas, revistas, libros, monos de competición e diversas distincións  entre a que destaca a Medalla de Prata ao Mérito Deportivo e a distinción ao Mérito Constitucional. Tamén conta  cun espazo para albergar ao mítico  Alpinche unha vez sexa restaurado.

Da súa longa traxectoria como piloto hai que destacar as súas 54 vitorias absolutas en probas de diferentes especialidades (rally, circuíto e montaña), 12 participacións no mítico  Rallye de  Montecarlo, onde ía participar como piloto oficial de Rover no ano 1966; e as súas dúas vitorias no  Rallye de España – RACE, naqueles tempos o máis importante do automobilismo nacional.

  • MUSEO DO TRAXE TRADICIONAL GALEGO:

O museo do traxe de Sta Cruz de Arrabaldo nace da necesidade dar un espazo expositivo ao material etnográfico relacionado coa vestimenta tradicional que ao longo dos anos foi recuperando a Escola Provincial de Danza-Castro Floxo, integrada no Centro de Cultura Popular Xaquín Lorenzo da Deputación de Ourense.

A mostra, en dous espazos claramente diferenciados e ilustrada cuns paneis informativos , ofrece en primeiro lugar unha selección de traxes tradicionais da segunda metade do século XIX e principios do século XX (uns orixinais e outros fieis reproducións) pertencentes aos diferentes estamentos sociais, dende os ricos traxes de gala até a humilde indumentaria dos labregos.

Nunha segunda sala realízase unha viaxe polo proceso de elaboración dos tecidos (liño e la), dende a obtención da materia prima até a súa transformación nunha tea, pasando pola preparación para o fiado, o fiado, o traballo no tear, cunha ampla mostra de material empregado para este traballo.

 

Santa Cruz de Arrabaldo, Ourense.

Nacional 120  – Ourense a Vigo.

Salida Km 582 Casardomato – Estación Santa Cruz de Arrabaldo.

42º21´09.7″N 7º59´23.4″W

Contacto: ctc-inorde@inorde.com