{"id":4511,"date":"2021-11-10T10:17:36","date_gmt":"2021-11-10T10:17:36","guid":{"rendered":"http:\/\/inorde.com\/?p=4511"},"modified":"2021-11-10T10:17:36","modified_gmt":"2021-11-10T10:17:36","slug":"o-xeodestino-terra-de-celanova-serra-do-xures-recibe-ao-prescritor-de-viaxes-paco-nadal","status":"publish","type":"post","link":"https:\/\/inorde.com\/es\/o-xeodestino-terra-de-celanova-serra-do-xures-recibe-ao-prescritor-de-viaxes-paco-nadal\/","title":{"rendered":"O xeodestino Terra de Celanova-Serra do Xur\u00e9s recibe ao prescritor de viaxes, Paco Nadal"},"content":{"rendered":"

Esta actuaci\u00f3n de promoci\u00f3n real\u00edzase co apoio da Axencia de Turismo de Galicia, e ten o obxectivo de proxectar unha Galicia aut\u00e9ntica a trav\u00e9s dos principais atractivos tur\u00edsticos deste territorio<\/strong><\/p>\n\n\n\n

O Inorde e o xeodestino Terra de Celanova-Serra do Xur\u00e9s, co apoio da Axencia de Turismo de Galicia, promoven unha acci\u00f3n de promoci\u00f3n deste territorio ourens\u00e1 co xornalista Paco Nadal, quen asegurou que esta viaxe polos principais recursos tur\u00edsticos deste xeodestino est\u00e1n a amosarlle \u201cunha Galicia aut\u00e9ntica, afastada das aglomeraci\u00f3ns e de car\u00e1cter natural\u201d.<\/p>\n\n\n\n

O co\u00f1ecido xornalista, que \u00e9 unha das persoas m\u00e1is influentes nos contidos sobre viaxes no panorama nacional, chegou a provincia o pasado luns 8 de novembro, en tren desde Madrid, para vivir en primeira persoa a experiencia tur\u00edstica de calquera visitante que se achegue ata Ourense. Durante o primeiro d\u00eda, co\u00f1eceu a vila de Celanova e a s\u00faa contorna, comezando a publicar nas s\u00faas propias redes imaxes de lugares patrimoniais tan emblem\u00e1ticos como o Mosteiro de San Rosendo, que tras visitalo en profundidade, asegurou que lle parec\u00eda “un dos grandes Mosteiros de Galicia e a Igrexa unha aut\u00e9ntica xoia\u201d, ao igual ca Praza Maior desta vila, sinalou.<\/p>\n\n\n\n

O martes, 9 de novembro, desprazouse ata a comarca da Baixa Limia para co\u00f1ecer a riqueza termal e patrimonial que ofrecen os municipios de Bande e Entrimo. Nesta ruta, visitou o Aquis Querquennis e as termas romanas. Para Paco Nadal, deben ser este conxunto arqueol\u00f3xico, xunto coa V\u00eda Nova e o legado romano, \u201co eixo sobre o que se vertebre este territorio para continuar a po\u00f1elo en valor\u201d. Nesta visita, tam\u00e9n co\u00f1eceu os recursos termais no municipio de Lobios asegurando o xornalista que \u201co termalismo, \u00e9 a outra gran baza deste xeodestino\u201d.<\/p>\n\n\n\n

Hoxe, 10 de novembro, Paco Nadal afondar\u00e1 na oferta natural polo que visitar\u00e1 o Parque Natural da Baixa Limia-Serra do Xur\u00e9s, e realizar\u00e1 unha ruta de sendeirismo e actividades de BTT, propias da oferta en turismo activo que ofrece esta zona.<\/p>\n\n\n\n

Ademais, ao longo desta semana, est\u00e1 a visitar pequenas empresas locais elaboradoras de produtos enogastron\u00f3micos de referencia nesta zona como son o mel, o queixo ou o chourizo, e realizar\u00e1 a ruta arqueol\u00f3xica Maus de Salas. A trav\u00e9s desta viaxe, Paco Nadal co\u00f1ecer\u00e1 os recursos cabeceira que representan a marca tur\u00edstica da nosa provincia (termalismo, patrimonio, natureza e enogastronom\u00eda), pero limitado aos municipios que integran este xeodestino e que son os seguintes: Cartelle, A Merca, Gomesende, Ramir\u00e1s, Padrenda, Quintela de Leirado, Celanova, Verea, Bande, Lobeira, Entrimo, Lobios, Mu\u00ed\u00f1os e A Bola.<\/p>\n\n\n\n

Esta viaxe forma parte dunha das acci\u00f3ns de promoci\u00f3n previstas para realizar neste xeodestino. Dela, xurdir\u00e1n contidos que se compartir\u00e1n en redes, tanto do propio xornalista, como do xeodestino, ao longo das vindeiras semanas. Paralelamente, estase a gravar un v\u00eddeo cuxo resultado final publicar\u00e1 Paco Nadal na s\u00faa canle de Youtube, e mostrarase o resultado deste traballo no mes de xaneiro no transcurso de Feira Internacional de Turismo de Madrid.<\/p>\n\n\n\n