A provincia de Ourense acollerá os días 20 e 21 de outubro de 2025 unha das citas máis destacadas do calendario gastronómico galego: o IV Campionato de Tapas e Pinchos de Galicia, que terá lugar no Mosteiro de San Pedro de Rocas, en Esgos.
Un certame que une gastronomía e territorio
A Ribeira Sacra, situada no corazón de Galicia e cun protagonismo especial en Ourense, consolidouse como un xeodestino de referencia onde conflúen natureza, historia, viño e gastronomía. Neste escenario único, ata 50 profesionais da cociña galega competirán pola coroa da gastronomía en miniatura de Galicia, elaborando tapas orixinais pensadas para sorprender en dous ou tres bocados.
A gran novidade do 2025 é a creación da categoría “Tapa Gluten Free”, unha iniciativa que promove a inclusión e o benestar, animando aos hostaleiros a deseñar propostas aptas para persoas celíacas, sen renunciar ao sabor nin á creatividade.
Inscricións abertas
As inscricións son gratuítas e estarán abertas ata o 28 de setembro en 👉 www.academiadelatapa.com.
Os participantes optarán non só ao título de mellor tapa de Galicia, senón tamén a máis de 3.000 € en produtos achegados polas empresas patrocinadoras e colaboradoras.
Unha aposta pola enogastronomía de Ourense
Este campionato é unha iniciativa de promoción turístico-gastronómica impulsada pola Deputación de Ourense, a través do Inorde, coa colaboración de Estrella Galicia como cervexa oficial, a D.O. Ribeira Sacra como viño oficial, e o apoio de empresas como Ibercook Food Service, Elmar, Aperol Spritz, Cabreiroá e Bétula Cars, entre outras.
