-
A xornada, enmarcada no proxecto europeo Circular Ecosystems, celebrarase este xoves, 30 de abril, na Casa da Cultura de Verín.
-
O obxectivo é dotar aos viticultores de ferramentas dixitais para a toma de decisións sostibles e eficientes no viñedo.
VERÍN, 29 de abril de 2026. – O Inorde, en colaboración co Consello Regulador da Denominación de Orixe Monterrei, organiza este xoves, 30 de abril, unha xornada formativa de carácter técnico dirixida aos profesionais da viticultura e o sector adegueiro da comarca.
O encontro ten como finalidade principal dar a coñecer o funcionamento e a utilidade da información recollida polas estacións meteorolóxicas instaladas no territorio. Estes dispositivos constitúen unha ferramenta estratéxica para o sistema de aviso temperán de pragas e enfermidades, un factor determinante para garantir a sanidade vexetal e a calidade da colleita.
Innovación e sostibilidade no rural Esta acción formativa enmárcase dentro do proxecto europeo Circular Ecosystems, no que o Inorde participa activamente como socio. A iniciativa ten como piar fundamental a aposta por modelos de agricultura máis sostibles, eficientes e fundamentados no coñecemento preciso do territorio.
“Coa dixitalización e o uso de datos meteorolóxicos, facilitamos ao viticultor unha ferramenta clave para a toma de decisións informadas, o que se traduce nunha mellor xestión dos recursos e nunha maior eficiencia produtiva”, sinalan fontes do Inorde.
Con esta iniciativa, o Inorde e o C.R.D.O. Monterrei reafirman o seu compromiso co apoio ao sector primario, promovendo a innovación aplicada ao campo e impulsando a modernización dun dos motores económicos máis importantes da comarca.
Detalles da convocatoria:
-
Data: Xoves, 30 de abril.
-
Hora: 10:00 h.
-
Lugar: Casa da Cultura de Verín.
