O presidente do Inorde, Rosendo Fernández, presentou en Lobeira o informe que agora avaliarán os representantes dos nove municipios polos que discorre esta ruta
Incentivarase o coñecemento por parte do peregrino do medio, atendendo especialmente a divulgar o máis destacable relativo ao entorno natural e aos restantes elementos de interese
Ourense, 10 de decembro de 2024.
A Deputación de Ourense, a través do Instituto Ourensán de Desenvolvemento Económico (Inorde), presentou o documento técnico do proxecto arqueolóxico de posta en valor e sinalización do Camiño de San Rosendo, un informe elaborado a petición dos nove concellos ourensáns polos que transcorre o itinerario de peregrinación.
O presidente do Inorde, Rosendo Fernández, presentou nun acto no Concello de Lobeira o citado documento, que será avaliado polos concellos para a súa posterior presentación á Dirección Xeral de Patrimonio, un paso necesario para obter as autorizacións que permitan avanzar na posta en valor deste itinerario xacobeo.
O proxecto de sinalización que se pretende levar a cabo nos concellos de Lobios, Muíños, Lobeira, Bande, Verea, Celanova, A Merca, San Cibrao das Viñas e Ourense, céntrase na formalización do Camiño Xacobeo e da Raíña Santa que foi recoñecido eclesiasticamente no ano 2021.
En concreto, a parte ourensán deste camiño de peregrinación vai dende a fronteira no termo municipal de Lobios ate o de Ourense, e está dividido en tres etapas. Ademais, este itinerario únese á Vía da Plata desde Ourense.
Seguridade, calidade e información
As actuacións a realizar tratan de conceder a este camiño de peregrinación a Santiago a suficiente versatilidade e calidade de información.
O trazado do itinerario efectuarase aproveitando os viais xa existentes, percorrendo os distintos puntos de interese presentes na zona; deste xeito establecerase como punto de partida principal do percorrido a Ponte Nova en Lobios.
O peregrino atopará no percorrido: seguridade, calidade e información sobre o tramo que realiza; incentivarase o coñecemento do medio atendendo especialmente a divulgar o máis destacable relativo ao entorno natural e aos restantes elementos de interese dende o punto de vista social, cultural e etnográfico da zona.
No documento para a sinalización axeitada téñense en conta aspectos como o emprego de materiais integrados na paisaxe da zona e o obxectivo de dinamización da zona mediante a captación dun elevado número de peregrinos.
