Ourense, 25 de agosto de 2023.– A xerente do Inorde, Emma González, asistiu hoxe á inauguración da terceira edición da Feira do Comercio Prolimia, organizada pola Asociación de Empresas e Comercios de Xinzo de Limia.
A Deputación de Ourense a través do Inorde colabora con este evento a través da liña de axudas que ten para o financiamento de accións de dinamización e promoción do comercio local realizadas por asociacións de comerciantes e tamén por asociacións empresariais municipais ou comarcais da provincia de Ourense das que formen parte comerciantes.
“Con esta axuda a Prolimia, unha das asociacións beneficiarias desta convocatoria, pretendemos apoialas en aquelas iniciativas que contribúen a reactivar o comercio de proximidade e, á súa vez, fomente o asociacionismo, como hoxe podemos ver nesta Feira”, salientou Emma González.
A xerente do Inorde trasladoulle os seus parabéns á entidade organizadora en nome da institución provincial, e agradeceu “o gran traballo que realizan ao longo do ano a prol do territorio cos seus negocios que fixan poboación e dinamizan a vida económica das vilas”.
Prolimia 2023
A Feira do comercio local Prolimia comezou hoxe e prolongarase todo o fin de semana para activar e dinamizar as ventas a finais do verán. Trátase dunha oportunidade para mostrar aos visitantes a calidade dos produtos e servizos ofertados polos establecementos comerciais de Xinzo de Limia e outros puntos do rural limiá.
Ademais dos expositores, o programa inclúe unha ampla variedade de actividades con diversos talleres e obradoiros, degustacións, xogos e música.
