O Centro de Desenvolvemento Agrogandeiro recibiu a visita de futuros enxeñeiros que, actualmente, están a cursar 3º de Enxeñería Agrícola e Agroalimentaria.
O alumnado, acompañado polo profesor de Cultivos Herbáceos Extensivos, Benigno Ruiz, tiveron a oportunidade de coñecer de primeira man as accións que a Deputación de Ourense realiza a través do Inorde, no campo da investigación e experimentación agraria, así como os servizos que presta de apoio técnico ós integrantes do sector agrario provincial.
O programa completouse con visitas organizadas polo Inorde a puntos de especial relevancia no sector produtor de pataca e cereal na Limia como: a Comunidade de Regantes de Antela, Gallega de Patatas, ou o Consello Regulador da IXP Pataca de Galicia.
