-
A xornada, enmarcada nos #ItinerariosGastronomicosdeValdeorras, terá lugar o vindeiro martes 13 de xaneiro en formato online.
-
A iniciativa busca ofrecer ferramentas prácticas para que os establecementos locais sexan máis competitivos e conecten mellor co viaxeiro dixital.
Ourense, 9 de xaneiro de 2026. O Inorde, dentro das súas accións de posicionamento dos #ItinerariosGastronomicosdeValdeorras, organiza unha sesión informativa e de capacitación dirixida especificamente aos aloxamentos rurais da comarca. Baixo o título “O futuro do turismo rural: claves para conectar, competir e medrar na era dixital”, esta xornada pretende dotar aos profesionais do sector de estratexias clave para optimizar a súa presenza na rede.
A sesión, que conta coa colaboración da Axencia de Turismo de Galicia, forma parte do plan de promoción do Xeodestino Trevinca Valdeorras. O obxectivo principal é poñer en valor o enorme potencial turístico do territorio, fomentando a cooperación entre os axentes locais e facilitando ferramentas que permitan ao sector adaptarse ás novas esixencias do mercado.
Contidos da sesión Durante a xornada, os participantes poderán afondar en aspectos fundamentais para o crecemento do seu negocio:
-
Análise das tendencias actuais e datos clave do sector do turismo rural.
-
Identificación dos factores que máis valora o viaxeiro actual á hora de elixir un aloxamento.
-
Estratexias para mellorar a visibilidade e a competitividade online.
-
Consellos prácticos para optimizar o perfil profesional en EscapadaRural, unha das plataformas líderes do sector.
Datos do evento e inscrición A participación na xornada é totalmente gratuíta, previa inscrición. O evento celebrarase no seguinte horario:
-
Data: Martes, 13 de xaneiro
-
Horario: De 10:00 a 11:00 h
-
Formato: Online
-
Inscrición: https://escapadaruralcom.typeform.com/valdeorras25
Esta actuación reafirma o compromiso do Inorde e de Turismo de Galicia coa profesionalización e o desenvolvemento sostible do turismo en Valdeorras, apostando pola dixitalización como motor para o crecemento e a posta en valor dun territorio único.
