Ourense, 8 de novembro de 2025.

O presidente do Inorde, Rosendo Fernández, recibiu hoxe na escalinata da Catedral de Ourense, aos turoperadores que están a participar na viaxe de familiarización organizada por esta entidade, en colaboración con Fairway, para dar a coñecer a oferta hostaleira, patrimonial e natural da Vía da Prata ao seu paso pola provincia de Ourense.

No encontro, os profesionais do sector trasladáronlle ao presidente do Inorde a súa “grata sorpresa” con este itinerario que a maioría descoñecía e puxeron en valor a gran riqueza patrimonial e turística que atesoura esta ruta xacobea.

Esta iniciativa, que se enmarca no Plan de Dinamización da Vía da Prata-Camiño Mozárabe da Deputación de Ourense, ten como obxectivo precisamente dar a coñecer os recursos naturais e patrimoniais deste itinerario a través da súa propia experiencia.

A viaxe, que comezou o xoves, 6 de novembro, levou aos turoperadores e á prensa especializada de Estados Unidos, Brasil, Indonesia, Sudáfrica, e España, a coñecer a calidade da oferta dos aloxamentos, da gastronomía e de todos os servizos que operan no territorio.

Visitaron referentes patrimoniais como Santa María de Mixós, a Fortaleza de Monterrei, a Colexiata de Xunqueira de Ambía, a Igrexa de Santiago de Allariz, o museo de Arte Sacra de Santa Clara, o Mosteiro de San Salvador, a Capela de San Miguel de Celanova, o Pazo de San Damián, a Catedral e, pola tarde, visitarán o Mosteiro de Oseira e o templo da Vera-Cruz. Tamén realizaron pequenas camiñatas para coñecer variantes do Camiño e degustaron a enogastronomía local de diferentes municipios polos que transcorre a Vía da Prata, outro dos atractivos desta experiencia.

Trátase de que, tras a súa propia experiencia no camiño, poidan impulsar, paquetes especializados na comercialización turística deste itinerario nas canles internacionais.